Qahirə, 23 avqust, AZƏRTAC

Misirin Aralıq dənizində yerləşən ən iri “Zöhr” qaz yatağından qaz hasilatı sutkada 2,7 milyard kubfuta çatıb.
AZƏRTAC xəbər verir ki, bu barədə İtaliyanın “Eni” neft-qaz konserni məlumat yayıb.
Məlumatda qeyd olunur ki, qaz yatağının yerləşdiyi ərazidə hasilat quyularının sayı 12-yə çatıb. Bildirilir ki, 2019-cu ilin sonu üçün “Zöhr” qaz yatağından hasilat sutkada 3,2 milyard kubfuta qədər çatacaq.
Xatırladaq ki, Misirin ən iri “Zöhr” qaz yatağı 2017-ci ilin dekabrında işlənilməyə başlanılıb və o vaxt qaz hasilatı sutkada сəmi 350 milyon kubfut təşkil edib, bu da indiki hasilatdan 8 dəfə azdır. “Zöhr” qaz yatağı İtaliyanın “Eni” (50 faiz), Rusiyanın “Rosneft” (30 faiz), Böyük Britaniyanın “BP” (10 faiz), Birləşmiş Ərəb Əmirliklərinin “Mubadala Petroleum” (10 faiz) və Misirin neft-qaz şirkətlərinin iştirak etdiyi konsorsium tərəfindən işlənilir.

Asya Hacızadə
AZƏRTAC-ın xüsusi müxbiri
Qahirə