Bakı, 15 iyul, AZƏRTAC

SOCAR-ın Birləşmiş Ərəb Əmirliklərinin “ENOC” şirkəti ilə müxtəlif layihələrə sərmayə yatırımları imkanlarını müzakirə edilib.
Şirkətdən AZƏRTAC-a bildirilib ki, SOCAR-ın prezidenti Rövnəq Abdullayev “ENOC” şirkətinin sədr müavini Şeyx Səid Məhəmməd Əl Tayerin rəhbərlik etdiyi nümayəndə heyəti ilə görüşüb. R.Abdullayev şirkətin həyata keçirdiyi yerli və beynəlxalq layihələr haqqında ətraflı məlumat verib. Bildirib ki, belə görüşlər yeni əməkdaşlıq əlaqələrinin yaradılmasında xüsusi rol oynaya bilər.
“ENOC” şirkətinin sədr müavini SOCAR-ın fəaliyyətini daim yaxından izlədiklərini qeyd edib. Görüşdə SOCAR və “ENOC” şirkətləri arasında treydinq üzrə əməkdaşlıq və müxtəlif layihələrə sərmayə yatırımları imkanları, eləcə də perspektivlər müzakirə edilib.
Görüşdən sonra qonaqlar “SOCAR Tower”dəki interaktiv neft muzeyi ilə tanış olublar.