Bakı, 15 may, AZƏRTAC 

Beynəlxalq Sosial Təminat Assosiasiyasının Avropa regionunda sosial sahədə qabaqcıl təcrübələrin qiymətləndirilməsi üçün keçirdiyi ən “Yaxşı təcrübə” müsabiqəsində Azərbaycanın daha bir uğurlu iş təcrübəsi - ölkəmizdə qeyri-rəsmi məşğulluğun qarşısının alınması sahəsində görülən tədbirlər ən “Yaxşı təcrübə” xüsusi mükafatına layiq görülüb.
Bu barədə AZƏRTAC-a Əmək və Əhalinin Sosial Müdafiəsi Nazirliyinin ictimaiyyətlə əlaqələr və kommunikasiya şöbəsindən məlumat verilib.
Nazirliyin məşğulluq siyasəti və demoqrafiya şöbəsinin müdiri Elnur Süleymanov Prezident İlham Əliyevin 2017-ci il 9 oktyabr tarixli Sərəncamı ilə təsdiq edilən “Azərbaycan Respublikasında qeyri-rəsmi məşğulluğun qarşısının alınmasına dair Tədbirlər Planı”nına əsasən ardıcıl işlərin aparıldığını bildirib.
O qeyd edib ki, ötən il əmək müqavilələrinin sayında 91,3 min artım qeydə alınıb. Həmçinin dövlət başçısının müvafiq Sərəncamı ilə minimal əməkhaqqının artması, qeyri-leqal məşğulluğun leqallaşmasının stimullaşdırılmasına yönələn təsirli tədbirlər, xüsusən özəl sektorda tətbiq olunan yeni vergi-sığorta güzəştləri, eləcə də təbliğat-maarifləndirmə işləri əmək müqavilələrinin sayının bu ilin 4 ayında 80 mindən çox artmasına imkan verib.