Bakı, 15 may, AZƏRTAC
Fövqəladə Hallar Nazirliyinin (FHN) Kiçikhəcmli Gəmilərə Nəzarət və Sularda Xilasetmə Dövlət Xidməti ilə FHN Akademiyasının birgə fəaliyyət planı əsasında xüsusi hazırlıq kursları təşkil edilib.
FHN-dən AZƏRTAC-a bildiriblər ki, Akademiyanın kursantları təcrübəli dalğıc mütəxəssislərin cəlb olunduğu hazırlıq kurslarında dinləyici kimi iştirak ediblər. Üç qrupda 3-cü dərəcəli dalğıc hazırlıq kursu Xidmətin Şıx sularda xilasetmə məntəqəsində təşkil olunub.
Kursantlara xidmətin fəaliyyət istiqamətləri, dalğıc hazırlığı kursunun nəzəri və təcrübi hissələri barədə ətraflı məlumat verilib.
Eyni zamanda, dalğıc avadanlığı və onlardan istifadə qaydaları izah olunmaqla sualtı dalğıc enişləri nümayiş etdirilib.