Azərbaycan Dövlət
İnformasiya Agentliyi

A
A
A
Sazlamalar

Abşeronda Novruz tonqalı “Yanardağ”dan gətirilən alovla qalanıb

Xırdalan, 19 mart, Ətrabə Rzayeva, AZƏRTAC

Martın 19-da Abşeron rayonunun inzibati mərkəzi - Xırdalan şəhəri büs-bütün Novruz bayramı libasına bürünüb. Abşeron Rayon İcra Hakimiyyətinin təşkilatçılığı ilə şəhərin Heydər Əliyev parkında keçirilən şənlikdə rayon rəhbərliyi, hüquq-mühafizə orqanlarının, təhsil, səhiyyə, təşkilat və müəssisələrin kollektivləri, şəhər sakinləri iştirak ediblər.
AZƏRTAC xəbər verir ki, parkın hər guşəsi bayram atributları ilə bəzədilib, məktəblər və bağçalar öz stendləri ilə qonaqları sevindirib. Parkda qutab, təndir çörəyi bişirilib, bayram şirniyyatları hazırlanaraq iştirakçılara paylanılıb.
Dədə Qorqud və Bahar qızı yazın gəlişini müjdə verməklə abşeronluların əhvali-ruhiyyəsinə bayram ovqatı qatıb. Bayram şənliyinin məşəlini alovlandırmaq üçün “Yanardağ” Dövlət-Tarix Mədəniyyət və Təbiət Qoruğundan gətirilən alovla tonqal qalanıb. Meydanda alovlanan tonqal qədim Oğuz yurdunun bir parçası olan Abşeronda Novruz şənliyinin ən maraqlı məqamlarından biri olub.
Rayon icra hakimiyyətinin başçısı İradə Gülməmmədovanın da qatıldığı bayram şənliyinə park gəzintisi ilə start verilib. Burada xalq oyunları, milli rəqslər, vətənimizi tərənnüm edən musiqilər, Keçəllə Kosanın məzəli əhvalatları və musiqi ustalarının ifaları abşeronluların əhvali-ruhiyyəsinə bayram ovqatı qatıb.
Xalqımızın milli–mənəvi dəyərlərini özündə ehtiva edən müxtəlif oyunlar, zarafatlar, ümumtəhsil məktəblərinin, məktəbəqədər tərbiyə müəssisələrinin Novruz ənənələri ilə bağlı hazırladıqları ədəbi-bədii kompozisiyalar, şeirləri, folklor kollektivlərinin maraqlı çıxışları, şagirdlərin əl işlərindən ibarət rəsm sərgiləri bayram tədbirinin iştirakçıları tərəfindən rəğbətlə qarşılanıb.
Milli geyimli qızlar bayram xörəklərini nümayiş etdirib, şənlik iştirakçılarını şirniyyata qonaq ediblər.
Gəzintidən sonra tanınmış incəsənət ustaları və Abşeron Mədəniyyət Evinin kollektivlərinin iştirakı ilə geniş bayram konsert proqramı təqdim olunub.

Regionlar 2019-03-19 19:44:00