Bakı, 16 mart, AZƏRTAC 

Prezident İlham Əliyevin 74 nəfərin Azərbaycan Respublikasının vətəndaşlığına qəbul edilməsi barədə imzaladığı Sərəncamın icrası çərçivəsində Dövlət Miqrasiya Xidmətində (DMX) həmin şəxslərin təntənəli andiçmə mərasimi keçirilib.
DMX-dən AZƏRTAC-a bildiriblər ki, qurumun rəisi Vüsal Hüseynov tədbir iştirakçılarını əlamətdar gün münasibətilə təbrik edib. Xidmət rəisi bildirib ki, Azərbaycan vətəndaşlığını əldə etmək şərəfinə nail olmaq istəyənlərin sayında ildən-ilə artım müşahidə olunur. Prezident İlham Əliyevin rəhbərliyi ilə tolerant və multikultural, təhlükəsiz ölkə kimi tanınan Azərbaycan bu gün dünya dövlətləri sırasında sosial, iqtisadi, siyasi, mədəni, bir sözlə, bütün sahələrdə dinamik inkişafı ilə fərqlənir. Məhz bu səbəbdən də Azərbaycanın tam hüquqlu vətəndaşı olmaq həqiqətən də böyük fəxr və xoşbəxtlikdir.
Xidmət rəisi milli-mənəvi dəyərlərimizi, qədim tarixi keçmişimizi, zəngin adət və ənənələrimizi özündə təcəssüm etdirən, qarşıdan gələn Novruz bayramı münasibətilə tədbir iştirakçılarını təbrik edib.
Sonra Azərbaycan Respublikasının vətəndaşlığına qəbul olunan 74 nəfər dövlət bayrağı qarşısında Konstitusiyaya əl basaraq ölkəmizə sadiq olacaqları barədə Azərbaycan dilində təntənəli şəraitdə and içiblər.
Tədbir Azərbaycan Respublikasının dövlət himninin ifa edilməsi ilə başa çatıb.