Əbu-Dabi, 14 fevral, AZƏRTAC
Dubayın rəqəmsal bankı smartfonların sığortası sahəsində bir ilkə imza atıb.
AZƏRTAC xəbər verir ki, rəqəmsal bankın “Liv.” adlı yeni mobil əlavəsi sayəsində Birləşmiş Ərəb Əmirliklərində (BƏƏ) mobil telefon sahibləri öz qurğularını sığorta etdirə biləcəklər. BƏƏ-də ilk “Liv.” mobil sığortası “RSA Insurance” şirkətinin tərəfdaşlığı ilə həyata keçirilir və sığorta polisinin əldə edilməsindən tutmuş tələb və ödənişlərin təqdim edilməsinədək tamamilə rəqəmsal, kağızsız prosesi yerinə yetirir.
“Liv.”in rəhbəri Cayaş Patel bu yeniliyi şərh edərək bildirib ki, yaradılan unikal təklifdə müştərilərə onların həyat tərzlərinə uyğun variantlar təqdim olunur. Onun sözlərinə görə, mobil qurğular istifadə zamanı tez-tez zədə alır. Hər dörd nəfərdən üçü həyatda azı bir dəfə telefonun ekranını sındırır, hər dördüncü adam isə telefonunu suya salır. Yeni xidmət mobil telefon sahiblərinə tam müdafiə təklif edir və tələblər olmadığı təqdirdə mükafatlandırır.
Bu təklif 2 ilədək istifadədə olan qurğulara şamil olunacaq.
Asya Hacızadə
AZƏRTAC-ın xüsusi müxbiri
Əbu-Dabi