Tokio, 8 dekabr, AZƏRTAC 

ABŞ-ın sanksiyalarına görə Rusiya helikopterlərini almaqdan imtina edən Filippin Amerikanın “Sikorsky Aircraft Corp.” şirkətinin istehsalı olan “Black Hawk” helikopterlərini 240 milyon dollara alacaq.
AZƏRTAC xəbər verir ki, bu barədə Reuters agentliyi məlumat yayıb.
Filippinin müdafiə naziri Delfin Lorenzan bildirib ki, hərbi hava qüvvələri ucuz olmasına baxmayaraq, Rusiya helikopterlərindən imtina edərək gələn il ABŞ helikopterlərinin alınması ilə bağlı müqavilə imzalayacaq.
Agentliyin məlumatına görə, Filippin ABŞ-ın “Sikorsky Aircraft Corp.” şirkətinin istehsalı olan “Black Hawk”, Rusiyanın Mi-171 və Cənubi Koreyanın “Surion and Agusta Westland” şirkətinin AW139 helikopterlərini nəzərdən keçirib.
Xatırladaq ki, 2017-ci ilin avqustunda ABŞ Prezidenti Donald Tramp Rusiya, İran və Şimali Koreyaya qarşı sanksiyaların tətbiqi barədə qanun imzalayıb. Bu qanun Rusiyanın müdafiə və energetika müəssisələrinə kreditlərin alınmasını çətinləşdirməklə yanaşı, həm də sanksiyaların Rusiya şirkətləri ilə əməkdaşlıq edən üçüncü ölkələrə tətbiqini də nəzərdə tutur.

Vüqar Ağayev
AZƏRTAC-ın xüsusi müxbiri
Tokio