Bakı, 12 noyabr, AZƏRTAC
Mərkəzi Bankın valyuta ehtiyatlarının həcmi ötən il ərzində 1,36 milyard ABŞ dolları artaraq dövrün sonuna 5,33 milyard dollar təşkil edib. Valyuta aktivlərinin idarə edilməsindən 58,2 milyon ABŞ dolları məbləğində gəlir əldə edilib.
AZƏRTAC Mərkəzi Bankın illik hesabatına istinadla bildirir ki, ötən il inkişaf etmiş ölkələrin mərkəzi banklarının pul siyasətlərinin normallaşdırılmasından irəli gələn aşağı gəlirlilik və yüksək dəyişkənlik şəraitində Mərkəzi Bankın valyuta ehtiyatlarının idarə edilməsi üzrə siyasətinin əsas prioriteti vəsaitlərin qorunub saxlanılması olub.
Valyuta ehtiyatlarının idarə edilməsi üzrə investisiya siyasətinin əsas komponentləri kimi aktivlərin yüksək kredit keyfiyyəti və likvidliyi təmin edilib. Hesabat ilinin sonuna rəsmi valyuta ehtiyatlarının 90 faizi ABŞ dollarında, 5 faizi avroda, 2 faizi funt-sterlinqdə, 3 faizi isə SDR-də (BVF-nin xüsusi borclanma hüquqları) etibarlı maliyyə institutlarında saxlanılıb.