Madrid, 16 oktyabr, AZƏRTAC 

UEFA Çempionlar Liqasının üçüncü turu çərçivəsində oynanılacaq “Qarabağ”-“Atletiko Madrid” oyunu ərəfəsində İspaniya mətbuatı Azərbaycan klubunun tarixinə geniş diqqət ayırıb.
İspaniyanın nüfuzlu idman nəşrlərindən olan “AS” qəzeti Azərbaycan çempionunun doğma şəhəri Ağdamın işğal edildiyi və dağıdıldığı haqqında məlumat verib.
AZƏRTAC xəbər verir ki, “AS” qəzetində dərc olunan “Qarabağ” klubu Ermənistan-Azərbaycan müharibəsi səbəbindən 24 ildir Bakıda” sərlövhəli yazıda müəllif Xesus Kolino “Qarabağ”-“Atletiko Madrid” oyununun keçiriləcəyi 70 min nəfərlik Bakı Olimpiya Stadionunun azarkeşlə dolacağını bildirib. O, bu böyük marağın səbəbini həm “Qarabağ”ın UEFA Çempionlar Liqasında oynayan ilk Azərbaycan komandası olması, həm də bu komandanın ölkədə müqavimətin simvolu, müharibənin qurbanı kimi tanınması ilə izah edib.

Aygün Əliyeva
AZƏRTAC-ın xüsusi müxbiri
Madrid