Bakı, 5 noyabr, AZƏRTAC

2016-cı il futbol üzrə Avropa çempionu Kriştiano Ronaldo Portuqaliya millisinin baş məşqçisi Jorje Jezuşa yığmanı tərk etmək qərarı barədə məlumat verməyib.
AZƏRTAC TASS agentliyinə istinadla xəbər verir ki, bu barədə Portuqaliyanın “A Bola” qəzeti yazıb.
Noyabrın 5-də Ronaldo Portuqaliya millisində çıxışını başa çatdırdığını açıqlayıb. “A Bola”nın məlumatına görə, Ronaldo ilə Jorje Jezuş sentyabrın 30-dan bəri danışmırlar.
Sentyabrın 30-da, təlim-məşq toplanışının ortasında Ronaldo Portuqaliya millisinin düşərgəsini tərk edib. Futbolçunun sözlərinə görə, buna səbəb Jorje Jezuşun iki dəfə ona verdiyi vədləri pozması olub. O, Millətlər Liqasının yeni mövsümündə Uels yığmasına qarşı keçirilən ilk oyunda (1:0) iştirak edib, Norveç millisi ilə qarşılaşmada (2:1) isə ehtiyat oyunçular skamyasında qalıb. Futbolçunun özünün bildirdiyinə görə, əslində həmin oyunda meydana çıxması nəzərdə tutulmayıb. Lakin baş məşqçi ondan 30 dəqiqə oynamağa hazır olmasını istəyib və isinmə hərəkətləri etmək üçün meydana göndərib. Buna baxmayaraq, Ronaldo oyuna daxil edilməyib.
Portuqaliya Futbol Federasiyası daha sonra hücumçunu bir ay müddətinə Portuqaliya milli komandasında oynamaqdan məhrum etdi. Cəza müddəti bitmək üzrə olduğundan, o, Millətlər Liqasının Danimarka (14 noyabr) və Uels (17 noyabr) ilə oyunlarında iştirak etmək hüququna malik idi.
41 yaşlı Ronaldo UEFA Çempionlar Liqasının beşqat qalibi, Avropa çempionu və Millətlər Liqasının ikiqat qalibidir. O, milli komandalar, Avropa çempionatları, Çempionlar Liqası və klublararası dünya çempionatları tarixində vurulan qolların sayına görə rekordlara sahibdir.
Futbolçu 2022-ci ilin dekabrından Səudiyyə Ərəbistanının “Əl-Nəsr” klubunda çıxış edir. Hücumçu karyerası ərzində Portuqaliyanın “Sportinq”, İngiltərənin “Mançester Yunayted”, İspaniyanın “Real Madrid” və İtaliyanın “Yuventus” komandalarında da oynayıb.
Ronaldonun karyerası ərzində vurduğu qolların sayı 985-ə çatıb. Bunlardan 150-si milli komanda, 835-i isə klub səviyyəsində vurulub.