Bakı, 17 oktyabr, AZƏRTAC

Bu gün nəticəni nəzərə almasaq, yaxşı oyun keçirdik. Artıq “Neftçi”nin “Qarabağ” və “Sabah” kimi rəqiblərlə qarşılaşmalarda özünü autsayder kimi hiss etdiyini demək olmaz. Əvvəllər “Qarabağ”a böyük hesabla uduzduğumuz vaxtlar olub. İndi isə rəqiblərimizdən qorxmuruq.
AZƏRTAC xəbər verir ki, bunu “Neftçi”nin baş məşqçisi Yuri Vernidub Premyer Liqanın VIII tur oyunundan (3:3) sonra təşkil olunan mətbuat konfransında deyib.
Mütəxəssis komandasının oyunundan razı qaldığını, lakin iki xal itirdiklərini bildirib: “Qarabağ” və “Neftçi” Azərbaycan çempionatında 1000 oyun keçirən iki klubdur. Bu, çox şey deməkdir. Düşünürəm ki, düzgün yoldayıq və “Neftçi”ni daha güclü komandaya çevirmək üçün çalışmağa davam edəcəyik. Məqsədimiz həmişə turnir cədvəlinin ən yüksək pilləsində olmaqdır. Çempionatın dörddəbir hissəsini geridə qoymuşuq və qarşıda 25 oyun var. Mövsümün sonunda nəyə nail olacağımızı növbəti matçlar göstərəcək. Düzgün istiqamətdə davam edən komanda istəyinə çata bilər. Səmimi deyirəm, son iki oyunda dörd xal itirdik. Xüsusilə də bugünkü qarşılaşmada qələbəni əldən verdiyimiz üçün təəssüflənirəm. Mən həmişə istəyirəm ki, “Neftçi” meydanda futbol oynasın, vaxtı uzatmağa çalışmasın. Futbolçuların yerdə uzanaraq vaxt keçirməsini deyil, oyunu davam etdirməsini istəyirəm. Bu, bizim seçdiyimiz yoldur. Başqalarında günah axtarmaqdansa, öz oyunumuza baxmalı, səhvlərimizdən nəticə çıxarmalı və irəli getməliyik. Bu prinsiplə davam etsək, daha yaxşı və güclü komandaya çevriləcəyik. Komandanın müdafiədə buraxdığı səhvləri və oyunun son dəqiqələrindəki çıxışını isə təhlildən sonra daha dəqiq qiymətləndirmək mümkündür. İndi sakitləşmək, oyunu yenidən izləmək və nəticələr çıxarmaq lazımdır”.
Qeyd edək ki, bu nəticədən sonra “ağ-qaralar" 17 xalla turnir cədvəlinin ikinci, eyni xala malik “köhlən atlar" isə üçüncü pillədə qalıb.

_{Fotoqraf - Azər İbrahimov}