Astana, 30 sentyabr, AZƏRTAC

Qazaxıstan, Özbəkistan və Birləşmiş Ərəb Əmirlikləri Pakistanın dəniz limanlarına çıxışı nəzərdə tutan Qazaxıstan - Özbəkistan - Əfqanıstan - Pakistan (CASA) yeni dəmir yolu marşrutu layihəsi üzərində birgə işləmək niyyətindədir.
AZƏRTAC Qazaxıstan Hökumətinə istinadla xəbər verir ki, müvafiq Anlaşma Memorandumunu Qazaxıstanın Nəqliyyat Nazirliyi, Özbəkistanın Nəqliyyat Nazirliyi və Birləşmiş Ərəb Əmirliklərinin Energetika və İnfrastruktur Nazirliyi imzalayıb.
CASA layihəsi Mərkəzi və Cənubi Asiya arasında nəqliyyat əlaqəsini təmin etməli, beynəlxalq daşımaların, ticarətin, logistikanın və investisiya əməkdaşlığının inkişafı üçün əlavə imkanlar yaratmalı olan yeni dəmir yolu istiqamətinin formalaşdırılmasını nəzərdə tutur.