Bakı, 29 sentyabr, AZƏRTAC

Qazaxıstanın Almatı şəhərində “Müstəqil Dövlətlər Birliyinin (MDB) bədən tərbiyəsi və idman sahəsində əməkdaşlıq haqqında Saziş”in iştirakçısı olan dövlətlərin Bədən Tərbiyəsi və İdman Şurasının iclası keçirilib.
Bu barədə AZƏRTAC-a Gənclər və İdman Nazirliyindən məlumat verilib.
İclasda nazirliyin Olimpiya və paralimpiya idman növləri sektorunun müdiri Aydın Məmmədov və Strateji təhlil sektorunun müdiri Ülviyyə Hacıyeva iştirak ediblər.
İclasda Almatı şəhərində “Birliyin İdman Paytaxtları” Dövlətlərarası Proqramının həyata keçirilməsi, MDB iştirakçısı olan dövlətlərin bədən tərbiyəsi və idman sahəsində əməkdaşlığının 2021-2030-cu illər üzrə İnkişaf Strategiyasının və MDB çempionatlarının keçirilməsinə dair Təqvim Planının icrası, həmçinin Qırğız Respublikasında IV MDB Oyunlarının keçirilməsi və 2027-ci ildə “Birliyin İdman Paytaxtları” Dövlətlərarası Proqramının həyata keçirilməsi və digər məsələlər müzakirə edilib.