Bakı, 17 sentyabr, AZƏRTAC

Texnologiya bir vasitədir və şirkətlər üçün bunu həqiqətən vacib və dəyərli edən insan və texnologiya faktorudur.
AZƏRTAC xəbər verir ki, bu barədə “PAŞA Maliyyə Holdinq”in baş icraçı direktoru Fərid Məmmədov “Baku ID 2026” innovasiya festivalının açılışında deyib.
“Biz bu barədə üç mərhələdə düşünürük. Birincisi, mümkün qədər daha ağıllı bir təşkilat olmaq istəyirik. Belə bir mövqedə olmaq və ya bunun haqqında xəyal qurmaq üçün əla zamandır, çünki bu gün biliyə əlçatanlıq demək olar ki, sıfır xərcdir. Lakin bu biliyi necə əldə etmək, qeyd olunduğu kimi necə mühakimə yürütmək və bu məlumata, biliyə əsaslanaraq necə qərar vermək — insan inkişafına və insanların təliminə böyük sərmayə tələb edir. Beləliklə, orta göstərici daha da yüksələcək. Orta istedad — bu gün “ağıllı istedad” adlandırdığımız göstərici — sabaha orta istedad olacaq, lakin bura çatmaq üçün insanlara necə öyrətmək lazımdır mövzusunda çox səy göstərməliyik.
İkincisi, məhsuldarlıqdır. Biz təşkilatımızdakı insanların yeni iş üsullarına töhfə verməyən gündəlik xırda, rutin işlərdən azad olmasını istəyirik. Yəni, bizim üçün AI və rəqəmsallaşma insanların rutin işlərdən azad olması, diqqətlərini dəyər yaradan və daha çox mühakimə tələb edən məsələlərə yönəltməsi məqsədinə xidmət edir. Amma yenə də, bunu bacarmaq üçün insanları gündəlik adi iş rejimində qalmamağa, təşkilatda bundan daha üstün pilləyə qalxmağa öyrətmək və inkişaf etdirmək lazımdır.
Üçüncüsü isə insanlar daha ağıllı, daha məhsuldar olduqdan və rutin işlərdən azad edildikdən sonra onların innovasiya yaratmaq ehtimalı və bacarığı daha yüksək olur. Bu, həm proseslərdə artan innovasiyadır, həm də yeni biznes sahələri, yeni kanallar kəşf etməkdir. Biz artıq təşkilatımızda bu yeni texnologiyanın, yeni iş üsullarının və daha ağıllı insanların yeni innovativ şeylər yarada bildiyini görürük. İnsanlara biliyə çıxışı necə əldə etməyi öyrətməkdən başlamaq lazımdır. Bünövrə budur. Lakin innovasiyaya keçməyib ikinci addımda, yəni sadəcə məhsuldarlıqda dayansanız, bu, ən yaxşı halda xərclərin azaldılması və optimallaşdırma məşğuliyyəti olacaq", - deyə F.Məmmədov əlavə edib.