Bakı, 24 iyun, AZƏRTAC

Dövlət Turizm Agentliyi və Asiyada Qarşılıqlı Fəaliyyət və Etimad Tədbirləri üzrə Müşavirənin (AQEM) Katibliyinin birgə təşkilatçılığı ilə keçirilən “AQEM ölkələrində dairəvi yaşıl turizm” mövzusunda beynəlxalq konfransın əsas məqsədi üzv ölkələr arasında turizm sahəsində əməkdaşlığın genişləndirilməsi, dairəvi iqtisadiyyatın turizmə tətbiqi ilə bağlı uğurlu təcrübələrin paylaşılması və ümumilikdə turizm əlaqələrinin inkişafına töhfə verməkdir.
AZƏRTAC xəbər verir ki, bunu jurnalistlərə açıqlamasında Dövlət Turizm Agentliyinin Mədəni irs və regional turizm şöbəsinin müdiri Elgün Cavadov deyib.
O bildirib ki, turizm müxtəlif ölkələr arasında əsas ünsiyyət vasitələrindən biri olaraq daim diqqət mərkəzindədir. Bu baxımdan, tədbir çərçivəsində turizmin ölkələrarası münasibətlərin möhkəmləndirilməsindəki rolu xüsusi vurğulanır.
Konfransın birinci günündə keçirilən panel müzakirələrində turizmin iqtisadiyyata, mədəniyyətə, ətraf mühitə və yerli icmaların inkişafına təsiri geniş şəkildə müzakirə olunub. Eyni zamanda, iştirakçı ölkələrin bu sahədə qazandıqları uğurlu təcrübələr konkret nümunələr əsasında təqdim edilib.