Naxçıvan, 8 may, AZƏRTAC

Mayın 8-də Naxçıvan şəhərində ədliyyə işçilərinin iştirakı ilə veloyürüş təşkil olunub.
Naxçıvan Muxtar Respublikası Ədliyyə Nazirliyinin mətbuat xidmətindən AZƏRTAC-ın bölgə müxbirinə bildirilib ki, tədbir Ümummilli Lider Heydər Əliyevin anadan olmasının 102-ci ildönümünə və “Konstitusiya və Suverenlik İli”nə həsr edilib. Tədbir muxtar respublika Ədliyyə Nazirliyinin, Azərbaycan Gənclər Fondunun və Velosiped Federasiyasının birgə təşkilatçılığı ilə baş tutub.
Veloyürüşün keçirilməsində məqsəd ədliyyə sahəsində ictimai iştirakçılığın artırılması, gənclər arasında sağlam həyat tərzinin təbliği və hüquqi maarifləndirmənin təşviqidir. Həmçinin yaşıl dünya naminə ətraf mühiti qorumaq, gənclərdə idmana həvəsini artırmaq və onları zərərli vərdişlərdən uzaqlaşdırmaq, cəmiyyətin sağlam inkişafına töhfə verməkdir.