İstanbul, 20 mart, Günel Karatepe, AZƏRTAC

Türkiyədə aldığım təhsil, keçdiyim təcrübələr mənə gələcəkdə texnologiya sahəsində işləmək və ölkəmizi qlobal arenada təmsil etmək imkanı verəcək. Məqsədim bu bilikləri tətbiq edərək Azərbaycanın kosmos və innovasiya sahəsində güclü mövqe qazanmasına töhfə vermək və dünya səviyyəsində rəqabət aparan texnologiyalar yaratmaqdır. Bu yol çətin olsa da inanıram ki, elm və təhsil texnologiyaları sahəsində atacağımız addımlar ölkəmizi daha da irəli aparacaq.
Bu sözləri AZƏRTAC-a müsahibəsində Azərbaycan Texniki Universitetinin SABAH qrupları tələbəsi Kənan Rzayev söyləyib.
Türkiyədə kosmos, aerokosmos, aviasiya, innovasiyalar, texniki elmlər, süni intellekt və mühəndislik sahələrində təcrübə mübadiləsində iştirak edən Kənan bu fürsəti gənclərə qazandıran hər kəsə təşəkkürünü ifadə edib: “Ümid edirəm ki, bu təşəbbüs davam edərək gələcək nəsillər üçün daha böyük imkanlar yaradacaq və Azərbaycanın elmi-texnoloji inkişafına töhfə verəcək”.
Xatırladaq ki, Azərbaycan universitetlərinin tələbələri kosmos, aerokosmos, aviasiya, innovasiyalar, texniki elmlər, süni intellekt və mühəndislik sahələrində Türkiyənin Bursa, Ankara və İstanbul şəhərlərində təcrübə mübadiləsi keçiblər.
“Azərkosmos”un KOSMİK Akademiyasının təşkilatçılığı və Türkiyənin Gökmen Aerokosmik və Aviasiya Mərkəzinin (GUHEM-Gökmen Uzay ve Havacılık Merkezi) dəstəyi, eləcə də Azərbaycanın Elm və Təhsil Nazirliyi, Elm və Ali Təhsil üzrə Dövlət Agentliyi və SABAH qruplarının əməkdaşlığı ilə həyata keçirilən layihəyə üç şəhid və qazi övladı cəlb olunub.