Balakən, 18 fevral, Mustafa Dadaşov, AZƏRTAC

Balakən Olimpiya İdman Kompleksində ötən il noyabrın əvvəlində başlanan və Zəfər Gününə həsr edilən bələdiyyə və təşkilat komandaları arasında minifutbol üzrə rayon turnirinə yekun vurulub. Şəki-Zaqatala Regional Gənclər və İdman İdarəsinin Balakən rayonu üzrə gənclər və idman sektorunun və Balakən Olimpiya İdman Kompleksinin birgə təşkilatçılığı ilə keçirilən turnirdə 14 komanda mübarizə aparıb.
Bu barədə AZƏRTAC-ın bölgə müxbirinə Şəki-Zaqatala Regional Gənclər və İdman İdarəsindən məlumat verilib. Dairəvi sistem üzrə keçirilən turnirin final oyununda Kortala və Qullar bələdiyyələrinin komandaları qarşılaşıblar. Rəqibini 3:2 hesabı ilə məğlub edən “Kortala” komandası turnirin qalibi adını qazanıb. Qabaqçöl kəndinin komandası turniri üçüncü pillədə başa vurub.
Turnirin qalibləri kubok, medal və diplomlarla mükafatlandırılıblar.