Sumqayıt, 8 noyabr, Ətrabə Rzayeva, AZƏRTAC

8 Noyabr - Zəfər Günü münasibətilə Sumqayıtın əsas meydanında respublikanın tanınmış incəsənət ustalarının iştirakı ilə möhtəşəm bayram konserti keçirilib.
AZƏRTAC xəbər verir ki, Azərbaycanın şanlı tarixindəki qürurlu günlərdən biri də noyabrın 8-də qeyd etdiyimiz Zəfər bayramıdır. Bu bayram qəhrəman Ordumuzun və xalqımızın Müzəffər Ali Baş Komandan İlham Əliyevin rəhbərliyi ilə yazdığı bir dastanın hekayəsidir. Qələbənin dördüncü ildönümü ölkəmizin hər yerində olduğu kimi, Sumqayıtda da böyük sevinclə qeyd edilib.
Bayram tədbirinin keçirildiyi ərazi, şəhərin mərkəzi küçələri, parklar və xiyabanlar şanlı Zəfərin dördüncü ildönümü ilə əlaqədar bəzədilib, Zəfərə həsr edilən plakatlar asılıb. Binaların eyvanlarında ölkəmizin üçrəngli bayrağı dalğalanır.
Konsert proqramından sonra təşkil olunan bayram atəşfəşanlığını Sumqayıtın minlərlə sakini izləyib.