Bakı, 7 noyabr, AZƏRTAC

Ukrayna Prezidenti Volodimir Zelenski Donald Trampla “əla telefon danışığının” olduğunu deyib.
AZƏRTAC xəbər verir ki, Volodimir Zelenski telefon söhbət zamanı amerikalı siyasətçini ABŞ-da keçirilən prezident seçkilərində qazandığı “tarixi və inandırıcı” qələbə münasibətilə təbrik edib.
Ukrayna lideri bu nəticənin respublikaçıların “təsirli seçki kampaniyası” sayəsində mümkün olduğunu vurğulayıb. “Biz sıx dialoqu davam etdirmək və əməkdaşlığımızı inkişaf etdirmək barədə razılığa gəldik”, - deyə o bildirib.
Volodimir Zelenski Donald Trampa, həmçinin “güc vasitəsilə sülh” prinsipini xatırladıb. Onun sözlərinə görə, ABŞ-ın yeni lideri bu prinsipi həyata keçirsə, hamı uğur qazanacaq.
Ukraynanın dövlət başçısı, onu da qeyd edib ki, insanlar inam, azadlıq və normal həyat istəyir. Kiyev üçün bu, müharibə olmadan, güclü Amerika, güclü Ukrayna və güclü müttəfiqlərlə həyat deməkdir.