Bakı, 10 oktyabr, AZƏRTAC

İtaliyanın Venesiya şəhərində 14-cü Trans-Regional Dəniz Gücü Simpoziumu keçirilib.
Müdafiə Nazirliyinin mətbuat xidmətindən AZƏRTAC-a verilən məlumata görə, simpoziumun əsas gündəliyi dənizaltı mühitin qorunması və təhlükəsizliyin təmin edilməsi üçün ölkələrin bu sahədə öhdəliklərə təşviq edilməsi məqsədi daşıyır.
İtaliyanın Hərbi Dəniz Qüvvələrinin komandanı admiral Enriko Kredendinonun dəvətinə əsasən Azərbaycanın bu ölkədəki hərbi attaşelik aparatının nümayəndəsi də tədbirdə iştirak edib.
Tədbirin açılış mərasimində İtaliya Respublikasının müdafiə naziri Quido Krosetto çıxış edərək qonaqları salamlayıb.
Trans-Regional Dəniz Gücü Simpoziumunda yüzə yaxın ölkənin Hərbi Dəniz Qüvvələrinin komandanları, eləcə də dörd yüzədək dəniz təşkilatının nümayəndələri iştirak ediblər.