Bakı, 17 sentyabr, AZƏRTAC

Azərbaycan Badminton Federasiyası (ABF) və Tailand Badminton Assosiasiyası arasında əməkdaşlıq memorandumu imzalanıb.
ABF-nin mətbuat xidmətindən AZƏRTAC-a verilən məlumata görə, memorandumu Azərbaycan Badminton Federasiyasının prezidenti Taleh Ziyadov və Beynəlxalq Olimpiya Komitəsinin üzvü, Tailand Milli Olimpiya Komitəsinin vitse-prezidenti, Dünya Badminton Federasiyasının vitse-prezidenti, Tailand Badminton Assosiasiyasının prezidenti Khunying Patama Leesvadtrakul imzalayıblar.
Memoranduma əsasən bir çox sahələrdə əməkdaşlıq proqramının həyata keçirilməsi, o cümlədən badmintonçuların hazırlıq səviyyəsinin artırılması məqsədilə birgə təlim-məşq toplanışlarının keçirilməsi, məşqçilərin təkmilləşdirilməsi üçün kursların təşkili, hakimlərin hazırlanması, idman infrastrukturunun inkişafı və idarə edilməsi sahələrində təlim və bilik mübadiləsinin həyata keçirilməsi nəzərdə tutulur.
Khunying Patama Leesvadtrakul Azərbaycana ilk dəfə səfər etməyindən məmnun qaldığını, ölkənin nüfuzlu yarışlara ev sahibliyi etməklə dünya idmanının təbliğində böyük rol oynadığını və böyük nüfuza malik olduğunu qeyd edib. O, həmçinin imzalanan sənədin əməkdaşlıq üçün çox mühüm olduğunu bildirib: “Bu bizim əhəmiyyətli münasibətlərimizin başlanğıcı, münasibətlərimizin gələcək inkişafı üçün əsas bünövrədir”.
Qeyd edək ki, 1950-ci ildə yaradılmış və Asiyanın güclü badminton assosiasiyalarından biri olan Tailand Badminton Assosiasiyası dünya komanda reytinqində 8-ci sırada qərarlaşır. Tailand Olimpiya Oyunlarında ilk medalını Paris Olimpiadasında qazanıb. Komanda kişilərin şəxsi yarışında gümüş mükafata sahib çıxıb. Badminton üzrə dünya çempionatında (2023-cü il) isə ilk qızıl medalını kişilərin şəxsi yarışında əldə edib. Hazırda Assosiasiyaya üzv olaraq 400 klub daxildir.
Xatırladaq ki, ABF daha əvvəl Türkiyə və Malayziya Badminton Federasiyaları ilə əməkdaşlıq memorandumu imzalayıb.
Bu əməkdaşlıq çərçivəsində beynəlxalq badminton turnirləri keçirilir, hakimlərimiz yarışlara qatılaraq peşəkarlığını artırır, yeniyetmə badmintonçularımız dünyada bu idman növündə aparıcı ölkələrdən sayılan Malayziyanın Kuala-Lumpur şəhərində yerləşən Petronans Badminton Mərkəzində təhsil alırlar.