Astana, 17 sentyabr, AZƏRTAC

Etibarlı tərəfdaş və Almaniyaya enerji resurslarının ən böyük təchizatçılarından biri olan Qazaxıstan alman bazarına neft ixracını artırmağa hazırdır.
AZƏRTAC Akordanın mətbuat xidmətinə istinadla xəbər verir ki, bu barədə Qazaxıstan Respublikasının Prezidenti Kasım-Jomart Tokayev Mərkəzi Asiya dövlət başçılarının Almaniyanın federal kansleri Olaf Şolts ilə görüşündə iştirak edərkən bildirib.
Prezident qeyd edib ki, Qazaxıstan karbohidrogen ehtiyatlarının uzunmüddətli və sabit tədarükünü təmin etmək üçün alman tərəfdaşlarının gələcək dəstəyinə ümid edir.
“Dövlətlərimizin davamlı tərəqqisi üçün alternativ enerji mənbələrinə keçidlə bağlı birgə fəaliyyətin intensivləşdirilməsini vacib hesab edirəm. Biz hidrogen enerjisinin inkişafı sahəsində qarşılıqlı faydalı əməkdaşlığa hazır olduğumuzu bildiririk”, -deyə Kasım-Jomart Tokayev bildirib.

Elşən Rüstəmov
AZƏRTAC-ın xüsusi müxbiri
Astana