ADAU-nun tələbə və məzunları AQTİ-nin iş şəraiti ilə tanış olublar
Bakı, 23 iyul, AZƏRTAC
Azərbaycan Qida Təhlükəsizliyi İnstitutu (AQTİ) Azərbaycan Dövlət Aqrar Universitetində (ADAU) baytarlıq və əczaçılıq ixtisasları üzrə bakalavr təhsili alan tələbələr və həmin ixtisaslar üzrə təhsilini son 5 ildə başa vurmuş məzunlar üçün təlim-təcrübə kursunu davam etdirir.
İnstitutun İctimaiyyətlə əlaqələr şöbəsindən AZƏRTAC-a verilən məlumata görə, kursun təşkil olunmasında məqsəd müvafiq sahələr üzrə kadr potensialının artırılması, gənc və perspektivli baytarlarla əczaçıların işə qəbulu və kadr ehtiyaclarının ödənilməsidir.
AQTİ və ADAU arasında mövcud olan “Əməkdaşlığa dair Anlaşma Memorandumu”na uyğun olaraq keçirilən kurs çərçivəsində tələbə və məzunlar AQTİ-nin Mərkəzi Baytarlıq Laboratoriyası ilə tanış olublar. Qeyd olunub ki, müasir maddi-texniki bazaya malik olan və beynəlxalq tələblərə cavab verən laboratoriyada patomorfoloji, mikrobioloji, virusoloji, seroloji, molekulyar-genetik, kimyəvi-toksikoloji və parazitoloji müayinələr həyata keçirilir. Laboratoriyada müayinələr zamanı Ümumdünya Heyvan Sağlamlığı Təşkilatının təlimatına uyğun olaraq, etibarlılığına və dəqiqliyinə zəmanət verilən testlərdən istifadə edilir, həmçinin beynəlxalq təşkilatlar tərəfindən təşkil olunan səriştəlilik sınaqlarında yüksək nəticələr əldə olunur.
Daha sonra iştirakçılara AQTİ tərəfindən baytarlıq-sanitariya sahəsində aparılan elmi tədqiqatlar haqqında ətraflı məlumat verilib. Elmi araşdırmalar zamanı referens məlumatlarla işləmək, tədqiqat zamanı diqqət yetirilməsi vacib məqamlar tələbə və məzunların diqqətinə çatdırılıb.
İştirakçıları maraqlandıran suallar peşəkar mütəxəssislər tərəfindən cavablandırılıb.
Qeyd edək ki, müvafiq sahələr üzrə nəzəri, praktik və mövcud qanunvericiliklə bağlı məsələləri əhatə edən kurs çərçivəsində bundan əvvəl iştirakçılar üçün onlayn təlimlər təşkil olunub. Növbəti mərhələdə isə onlar müasir tələblərə cavab verən heyvan kəsimi məntəqəsinə baxış keçiriblər. Kursun yekununda isə iştirakçıların qiymətləndirilməsi aparılacaq və uğur qazananlara sertifikat veriləcək. Bundan əlavə, onlar müvafiq müsahibədən keçiriləcək və uğur qazananlar AQTİ-də ixtisaslarına uyğun işlə təmin olunacaqlar.
Azərbaycan-Pakistan Hökumətlərarası Birgə Komissiyasının fəaliyyəti yüksək qiymətləndirilib
Sədr müavini: Kosmik texnologiyalar sahəsində gənclər üçün xüsusi proqramlar hazırlanır
ATGTİ sədri: Bugünkü forum gənclərin beynəlxalq səviyyədə uğur qazanmasına töhfə verəcək
® “Klinik protokolların tətbiqinin gündəlik praktikada əhəmiyyəti“ mövzusunda seminar keçirilib