Laçın meşələrindəki arıçılıq təsərrüfatından bol məhsul gözlənilir FOTO
Laçın, 15 iyul, Aydın Yavərzadə, AZƏRTAC
Əsrarəngiz təbiətə malik olan Laçın həm də arıçılıq təsərrüfatları üçün bol nektar bazası sayılır. İşğaldan azad edildikdən sonra arıçılar mövsümə uyğun olaraq Laçın meşələrində öz arı ailələrini bəsləyirlər. Belə arıçılardan biri də əslən Laçından olan Kamal Allahverdiyevdir.
AZƏRTAC-ın bölgə müxbiri xəbər verir ki, arıçı Kamal Allahverdiyev Laçına 130-dan çox arı ailəsi ilə qayıdıb. Əsas məqsədi isə ata-babasından yadigar qalan bu peşəni Laçında yaşatmaqdır. O, hazırda Laçın şəhəri ilə yanaşı, rayonun dağlıq hissələrində də arı ailələrini bəsləyir.
“Arıçılıq peşəsi ata-babamdan qalıb. Tale elə gətirdi ki, doğma yurdumuzdan köçkün düşdük, həmin vaxt 9 yaşımda idim. Məcburi köçkünlük dövründə arıçılıqla məşğul oldum və öz təsərrüfatımı yaratdım. İnanırdım ki, bu arı ailələrini vaxt gələcək doğma Laçınımızda bəsləyəcəyəm. O gün gəldi. Artıq dördüncü ildir ki, təsərrüfatımla Laçındayam. Buranın təbiəti zəngindir, arılar üçün bol nektar bazası var”, - deyən arıçının təsərrüfatında 140 arı ailəsi var.
O, arı ailələrinin yerini tez-tez dəyişir. Arı alilərinin böyük hissəsini Laçının Muncuqlu dağındakı cökə meşələrində yerləşdirib. 28 arı ailəsini isə Ərikli kəndində kəklikotunun bol olduğu ərazidə bəsləyir. Buranın təbiəti xüsusi dada malik bal götürməyə imkan verir. Arıçı bu mövsüm məhsuldarlığın yüksək olacağını proqnozlaşdırır. O, 2 ton məhsul götürməyi planlaşdırır.
Qəbələdə kamera musiqisi həvəskarlarına növbəti konsert proqramı təqdim olunub
“Azərbaycan Atabəyləri” filmi Laçında nümayiş olunub
Astarada qəza baş verib, motosiklet sürücüsü ölüb
Naxçıvanın muxtariyyəti - tarixi zərurət, tarixi nailiyyət
“Qış nağılı” Beynəlxalq Musiqi Festivalında möhtəşəm kamera musiqisi axşamı keçirilib