Ağdam, 30 may, AZƏRTAC

Ağdam Sənaye Parkının rezidenti kimi 2022-ci ildə qeydiyyata alınan “Eel Electric” MMC elektrik paylayıcı avadanlıqların və elektrik yuvalarının istehsalı ilə məşğul olacaq. Müəssisədə 35-10 kV paylayıcı qurğular, 0.4 kV paylayıcı panellər, kondensator qurğuları, müxtəlif növ transformator məntəqələrin istehsalı həyata keçiriləcək.
MMC-nin təsisçisi və direktoru Vüsal Mirzəyev AZƏRTAC-ın bölgə müxbirinə bildirib ki, hazırda müəssisədə tikinti işləri yekunlaşmaq üzrədir. İndiyədək görülmüş işlərə təxminən 1,5 milyon manat investisiya yatırılıb və işlərin 75 faizi yekunlaşıb. Türkiyə və Avropanın qabaqcıl ölkələrindən avadanlıqlar gətirilib, yaxın vaxtlarda onların quraşdırılmasına başlanılacaq.
Ağdam Sənaye Parkının 1,7 hektar ərazisində inşa edilən müəssisədə 70 nəfər daimi işlə təmin ediləcək. İstehsal olunan məhsulların əsasən Qarabağda aparılan tikinti-quraşdırma işlərində geniş istifadə edilməsi planlaşdırılır.