Bakı, 24 may, AZƏRTAC

Azərbaycanda səfərdə olan ABŞ-ın Men ştatının rəsmilərindən və ictimaiyyətin tanınmış üzvlərindən ibarət nümayəndə heyəti işğaldan azad edilmiş Şuşa və Laçında olub.
AZƏRTAC xəbər verir ki, qonaqlara Şuşa şəhərində mövcud vəziyyət haqqında məlumat verilib, aparılan sürətli bərpa və yenidənqurma işləri göstərilib. Şuşaya yeni köçənlər üçün yaradılan şəraitlə tanış olan nümayəndə heyəti görülən işləri yüksək qiymətləndirib. Qonaqlar işğal dövründə Ermənistan tərəfindən Şuşa şəhərində mədəniyyət abidələrinə, məscidlərə qarşı törədilmiş vandalizm aktlarını pisləyiblər. Ardınca qonaqlar Vaqifin məqbərəsi, Gəncə qapıları, “Güllələnmiş heykəllər” abidəsini, Cıdır Düzünü, Yuxarı Gövhər Ağa məscidini ziyarət ediblər.
ABŞ nümayəndə heyəti sonra Laçına yola düşüb. Qonaqlara Laçına yeni köçənlər üçün yaradılan şərait, iş yerləri və onların sosial təminatı, rayonda aparılan yenidənqurma, təmir-bərpa işləri haqqında ətraflı məlumat verilib. Laçın şəhərində yerləşən Aqro və Sənaye Parkında, istixanada, ferma və mebel sexində və Sus kəndində olublar.
Sus kəndində qonaqları mehriban və gülərüz qarşılayan yerli sakinlər onları evlərinə dəvət edib, dövlətin yaratdığı gözəl şəraitlə yaxından tanış ediblər. Azərbaycan təbiətinin gözəlliyi və yerli sakinlərin qonaqpərvərliyi nümayəndə heyətində xoş təəssüratlar oyadıb.