Pekin, 30 aprel, AZƏRTAC

Çinin kosmik stansiyasında 6 aylıq fəaliyyətini başa vuran “Şencou-17” missiyasının astronavtları aprelin 30-da Yerə qayıdıblar.
AZƏRTAC xəbər verir ki, bu barədə Çin Kosmos Agentliyi məlumat yayıb. Astronavtlar Tan Honbo, Tan Şencie və Cian Sinlini gətirən “Şencou-17” kosmik gəmisinin xüsusi kapsulu Pekin vaxtı ilə bu gün səhər saat 8:43-də “Tienqon” kosmik stansiyasından ayrılıb. Kapsul saat 18:00 radələrində Qobi səhrasındakı “Donfen” meydançasına enib. Astronavtlar ilkin tibbi yoxlanışdan sonra xüsusi təyyarə ilə Pekinə yola salınacaq. Agentlik “Şencou-17” missiyasının uğurla başa çatdığını elan edib.
Qeyd edək ki, “Şencou-17” missiyasının kosmik səyahəti ötən il oktyabrın 26-da başlayıb. Astronavtlar kosmik stansiyada müxtəlif test və texniki yoxlanışlar həyata keçiriblər. Onları kosmik stansiyada aprelin 25-də start verilmiş “Şencou-18” missiyasının üç üzvü əvəzləyib. “Şencou-18” missiyasının da kosmosda təxminən 6 ay qalması planlaşdırılır.