Tbilisidə parlamentin binası önündə aksiya keçirilib
Tbilisi, 15 aprel, AZƏRTAC
Gürcüstanın müxtəlif siyasi partiyaları, qeyri-hökumət təşkilatları, tələbə-gənclər hərəkatları və təşəbbüs qrupları hakim “Gürcü Arzusu-Demokratik Gürcüstan” partiyasının “Xarici təsirin şəffaflığı haqqında” (“xarici agentlər” haqqında) qanun layihəsinin parlamentin hüquq komitəsində müzakirə olunmasına etiraz olaraq aprelin 15-də paytaxt Tbilisidə izdihamlı aksiya keçirib.
AZƏRTAC xəbər verir ki, parlamentin qarşısındakı mərkəzi Ş.Rustaveli prospekti tam bağlanıb.
Aksiyanın təşkilatçılarının sözlərinə görə, etirazın məqsədi ölkənin azadlığını və Avropa gələcəyini qorumaqdır.
Qeyd edilib ki, bu qanun ölkədə demokratiyanın inkişafına, siyasi partiyaların və QHT-lərin fəaliyyətinə, eləcə də söz və mətbuat azadlığına mənfi təsir göstərəcək. Eyni zamanda, insan hüquq və azadlıqlarının pozulmasına səbəb olacaq.
Saat 19:00-da başlayan aksiyada minlərlə insan iştirak edir.
Parlamentin önündə Gürcüstan və Avropa İttifaqının bayraqlarını tutan aksiyaçılar “Rusiya qanununa yox”, “Biz Avropadayıq” kimi şüarlar səsləndirib, hökumətdən məlum qanun layihəsini parlamentin müzakirəsindən geri çağırmağı tələb ediblər.
Qeyd edək ki, bu gün parlamentin hüquq komitəsinin iclasında “Xarici təsirlərin şəffaflığı haqqında” qanun layihəsinin müzakirəsi zamanı deputatlar arasında əlbəyaxa dava olub. Müxalifətdən olan deputat Aleko Elisaşvilinin parlamentdə döyülməsi və nalayiq sözlərlə təhqir olunması müxalifəti dəstəkləyənlərin sayının artmasına səbəb olub.
Aksiya səbəbi ilə parlamentin binasının ətrafına çoxlu sayda polis cəlb edilib.
Xətayi Əzizov
AZƏRTAC-ın xüsusi müxbiri
Tbilisi
Milanda içki satışına bəzi qadağalar qoyulub
Vyetnamda qidadan 487 nəfər zəhərlənib
Çin Ayın görünməyən tərəfinə kosmik missiyaya start verib
İndoneziyada torpaq sürüşməsi və sel 7 nəfərin həyatına son qoyub
Gürcüstan Fransanın Avropa və Xarici İşlər Nazirliyini qeyri-obyektivlikdə günahlandırıb