Şəkidə “Sərhəd” hərbi-idman oyununun zona birinciliyinin qalibləri müəyyənləşib
Şəki, 3 aprel, Mustafa Dadaşov, AZƏRTAC
“Sərhəd” hərbi-idman oyunu üzrə respublika birinciliyinin aprelin 3-də Şəki rayonunda keçirilən zona mərhələsinin yarışları rayonun Kiş kənd 1 nömrəli tam orta məktəbin “Şimşək” komandasının qələbəsi ilə başa çatıb. Dövlət Sərhəd Xidmətinin (DSX) Şəki rayonundakı N saylı hərbi hissəsində keçirilən yarışda Qax, Şəki, Oğuz və Qəbələ rayonlarının ümumtəhsil məktəblərinin X sinif şagirdlərindən təşkil edilmiş komandalar mübarizə aparıb.
Bu barədə AZƏRTAC-ın bölgə müxbirinə Şəki-Zaqatala Regional Təhsil İdarəsindən məlumat verilib.
Zona birinciliyinin rəsmi açılışında bildirilib ki, Təhsil, Gənclər və İdman nazirliklərinin, DSX-nin birgə təşkilatçılığı ilə hər il keçirilən “Sərhəd” hərbi-idman oyununun əsas məqsədi gənc nəsli Vətənə, dövlət atributlarına, dövlət sərhədinə hörmət ruhunda tərbiyə etmək, yaradıcı, düşünən, sağlam gənclər yetişdirmək və onlarda sərhədçi peşəsinə marağı artırmaq, həmçinin məktəb şagirdlərini hərbi-idman oyunlarına cəlb etməklə, onların ordu sıralarında xidmətə hazırlanmasına kömək göstərməkdir.
Zona turunun nəticələrinə əsasən, Qəbələ rayonunun Abrıx kənd tam orta məktəbinin “Abrıx” və Qax şəhər 4 nömrəli tam orta məktəbin “Uludağ” komandaları müvafiq olaraq ikinci və üçüncü yerləri tutublar.
Qaliblərə diplom, kubok və hədiyyələr təqdim olunub.
Yarışın qalibi olan “Şimşək” komandası, eyni zamanda, hərbi-idman oyununun respublika mərhələsinə vəsiqə qazanıb.
Kənd Təsərrüfatı Nazirliyinin şöbə müdiri Lənkəranda vətəndaşların müraciətlərini dinləyib
Dini konfessiyaların nümayəndələri Suqovuşan və Talışdakı Alban məbədlərini ziyarət ediblər
Forum iştirakçıları Ağdamın dağıdılmış abidələrini ziyarət ediblər
AXA-nın sədri Beyləqanda vətəndaşları qəbul edib, təsərrüfatlara baş çəkib