Naxçıvan, 3 aprel, AZƏRTAC

Araz çayından qidalanan nasos stansiyalarının təzyiqli boru xətlərinə qeyri-qanuni müdaxilələrin fəsadları aradan qaldırılıb.
AZƏRTAC-ın Naxçıvan bürosu xəbər verir ki, “Qaraçuq-2” nasos stansiyasının Babək şəhərindən keçən hissəsindəki xətlərdə qəza baş verib. Su xətlərinin partlaması nəticəsində Babək şəhərinin, Nehrəm qəsəbəsinin və rayonun Qoşadizə məhəlləsinin əkin sahələrinə suvarma suyunun verilməsində 6-7 saatlıq fasilə yaranıb.
Naxçıvan Muxtar Respublikası “Meliorasiya və Su Təsərrüfatı” ASC-nin Babək rayon Meliorasiya və Su Təsərrüfatı İdarəsinin əməkdaşları və texnikaları dərhal qəza baş verən əraziyə cəlb olunublar. Qəza baş verən xətlərə baxış zamanı məlum olub ki, vətəndaşlar tərəfindən qeyri-qanuni yolla borulara olan müdaxilələr su xətlərinin qəzalı vəziyyətə düşməsinə səbəb olub. Dərhal idarə əməkdaşları tərəfindən qəza vəziyyəti aradan qaldırılıb, suvarma suyunun verilməsi təmin edilib.