Bakı, 2 aprel, AZƏRTAC

Rusiyanın Sank-Peterburq şəhərində nəşr olunan “Tour Press Club” jurnalının baş redaktoru Anatoli Kovalev və jurnalistlər, blogerlər aprelin 2-də Leopold və Mstislav Rostropoviçlərin ev-muzeyinin qonağı olublar.
Bu barədə AZƏRTAC-a muzeydən bildirilib.
Bakıda doğulan Anatoli Kovalev bildirib ki, Bakı şəhərində Leopold və Mstislav Rostropoviçlərin ev-muzeyinin olduğunu bilən kimi muzeyi ziyarət etmək istəyib.
Muzeyin əməkdaşları tərəfindən qonaqlara muzey haqqında geniş məlumat verilib. Leopold və Mstislav Rostropoviçlərin həyat və yaradıcılığı ilə yaxından tanış olan qonaqlar bir daha bu iki dahi musiqiçinin yaradıcılığına heyran qaldıqlarını söyləyiblər.
Qonaqlar muzeyin xatirə kitabına ürək sözlərini və təəssüratlarını yazıb, xatirə şəkilləri çəkdiriblər.
Qeyd edək ki, “Tour Press Club” jurnalı 2000-ci ildən nəşr olunan peşəkarlar üçün ixtisaslaşmış nəşrdir. Turizm və mədəniyyət bir-biri ilə sıx bağlıdır və bunu jurnalın səhifələrində çıxış edən məşhur ekspertlər də təsdiqləyir. Jurnalın alıcıları arasında məşhur muzeylər, teatrlar, konsert salonları var.