Altı yeni quyu qazılıb, daha bir neçə quyunun qazılması planlaşdırılır

GL minimum məcburi iş proqramı çərçivəsində “Buzovna-Maştağa”, “Qala” və “Zirə” neft yataqlarında planlaşdırılan altı yeni quyunun qazma işlərini insidentsiz, ətraf mühitə heç bir zərər vermədən və ən qısa müddət ərzində müvəffəqiyyətlə başa vurub. Eyni zamanda, 2023-cü ildə GL afilə edilmiş şirkəti “Taghiyev Operating Company” tərəfindən istismar edilən cari yataqlarda 15 faizdən artıq hasilat enməsinin qarşısını alaraq ilin əvvəli ilə müqayisədə gündəlik hasilatı 10 faizdən çox artırmağa nail olub.
Bundan əlavə, GL afilə şirkəti “Salyan Oil Limited” tərəfindən istismar edilən “Kürsəngi” və “Qarabağlı” neft yataqlarında 19 il davam edən hasilat enməsini dayandıraraq artıma nail olub. Bu uğurların hamısı böyük məbləğdə kapital investisiya edilmədən, yalnız səmərəli hasilat proqramlarının tətbiqi ilə əldə edilib.
2024-cü ildə GL şirkəti “Kürsəngi” və “Qarabağlı” yataqlarında dərinliyi 4000 metrdən çox olacaq iki yeni quyunun və iki yan lülənin qazılması ilə bağlı tender elan etməyi planlaşdırır. Özünün texniki xüsusiyyətlərinə görə bu quyular Xəzər regionunda mövcud olan bir çox mürəkkəb quyudan geri qalmayacaq. Salyan sahəsində planlaşdırılan bu qazma işləri həmin yataqlarda 13 il davam edən qazma fasiləsini aradan qaldıracaq mühüm mərhələdir.
“Qısa müddət ərzində əldə etdiyimiz nailiyyətlərlə fəxr edirik. Bu, komandamızın mükəmməlliyə və yüksək nəticələr göstərməyə sadiqliyinin təzahürüdür”, - deyə GL-in baş icraçı direktoru Asif Zeynalov qeyd edib.
GL şirkəti bu mühüm nailiyyətlərin əldə edilməsində göstərdiyi davamlı dəstəyə görə “SOCAR Upstream Management International” MMC-yə öz təşəkkürünü bildirir.
Qeyd edək ki, GL Azərbaycanın ilk özəl yerli enerji şirkətidir. Şirkət Salyan rayonunda “Kürsəngi” və “Qarabağlı”, Abşeron yarımadasında “Buzovna-Maştağa”, “Qala” və “Zirə” olmaqla Azərbaycanda beş yataqda neft-qaz əməliyyatları həyata keçirir. GL-in biznes portfelinə “Salyan Oil Limited”, “Taghiyev Operating Company” əməliyyat şirkətləri və sənaye üzrə çoxsaylı xidmətlər təqdim edən “GL Technical Services” MMC daxildir.