Bakı, 27 fevral, AZƏRTAC

Fevralın 27-də Fransanın Nitsa şəhərində Ümumdünya Antidopinq Agentliyinin (WADA) sosial elmi tədqiqatlar simpoziumu keçirilib. Tədbirdə ölkəmizi Azərbaycan Milli Antidopinq Agentliyinin (AMADA) Elm şöbəsinin müdiri Rüfət Efendiyev təmsil edib.
AMADA-dan AZƏRTAC-a bildirilib ki, WADA-nın təşkil etdiyi simpoziuma 50-yə yaxın ölkədən nümayəndə heyəti qatılıb.
Cote d'Azur Universitetində keçirilən və sessiyalar üzrə davam edən tədbirdə birgə əməkdaşlıq, beynəlxalq və müxtəlif idman növləri üzrə tədqiqatların aparılması, araşdırmalara idmançıların tərəfdaş kimi cəlb edilməsi və təmiz idman üçün gələcək tədqiqat prioritetlərinin müəyyən olunması kimi müasir mövzularda müzakirələr aparılıb.