Qazax, 26 fevral, Ruslan Novruzoğlu, AZƏRTAC

XX əsrin ən dəhşətli faciələrindən olan Xocalı soyqırımı qurbanlarının əziz xatirəsi respublikamızın hər yerində olduğu kimi, Qazax rayonunda da dərin hüznlə anılıb.
AZƏRTAC-ın bölgə müxbiri xəbər verir ki, Xocalı soyqırımının 32-ci ildönümü ilə əlaqədar rayonun idarə, müəssisə və təşkilatlarında, ali və orta ümumtəhsil məktəblərində, təhsil, səhiyyə və mədəniyyət müəssisələrində soyqırımı qurbanlarının xatirəsi bir dəqiqəlik sükutla yad edilib, silsilə anım tədbirləri təşkil olunub.
Qazax Rayon İcra Hakimiyyətinin rəhbərliyi, icra aparatının məsul işçiləri, rayonun hüquq-mühafizə orqanlarının əməkdaşları, şəhid ailələri, qazilər Şəhidlər xiyabanına gələrək memorial önünə tər qərənfillər düzüb, faciə qurbanlarına və şəhidlərimizə olan ehtiramlarını bildiriblər.
Saat 17:00-da respublikamızın hər yerində olduğu kimi, Qazax rayonunda da soyqırımı qurbanlarının xatirəsi bir dəqiqəlik sükutla anılıb, küçələrdə hərəkət dayandırılıb, səs siqnalları verilib.