Bakı, 24 fevral, AZƏRTAC
Fransa prezidenti Emmanuel Makron Yeddilər Qrupunun (G7) İtaliyanın Baş naziri Ciorcia Meloninin sədrliyi ilə videokonfrans formatında keçiriləcək sammitində iştirak etməyəcək.
AZƏRTAC xəbər verir ki, “La Repubblica” qəzeti bu barədə Yelisey sarayındakı mənbələrə istinadla məlumat yayıb.
Emmanuel Makronun Ukrayna ilə bağlı keçiriləcək sammitdə iştirak etməməsinə rəsmi səbəb kimi fermerlərin kütləvi etirazları fonunda daxili işlərlə məşğul olması göstərilir. Bununla belə, nəşr qeyd edir ki, Meloninin Kiyevə gəldiyi və oradan G7-nin digər liderləri, o cümlədən ABŞ Prezidenti Co Baydenlə videobağlantı qurulacağı nəzərə alınarsa, Makronun qərarı italyan tərəfdaşlarına hörmətsizlik ifadəsidir.
Roma və Paris arasında münasibətlər ənənəvi olaraq soyuqdur. Ukraynada müharibənin başlamasının ikinci ildönümünə həsr edilmiş G7 sammitinin təşəbbüskarı məhz İtaliya olub. Emmanuel Makron fevralın 26-da Ukrayna ilə bağlı məxsusi görüşünü keçirmək fikrindədir. Bu görüşdə isə Ciorcia Meloninin iştirakı gözlənilmir.
Qəzetin yazdığına görə, G7-nin virtual sammitində Fransanı müdafiə naziri Sebastyan Lekorn təmsil edəcək.