×
A
A
A
Sazlamalar

AzTU SAP Universitetlər Alyansına üzv oldu

Bakı, 23 fevral, AZƏRTAC

Azərbaycan Texniki Universiteti (AzTU) Almaniyanın müəssisə resurslarının planalaşdırılması sahəsində məşhur proqram təminatı şirkəti olan SAP-ın Qlobal SAP Universitetlər Alyansına üzv olub. Alyansın məqsədi SAP-ın məhsulları, şirkətin tədris və tədqiqat sahələrində həyata keçirdiyi layihələr barədə üzv universitetləri məlumatlandırmaq və onlarla birgə təşəbbüsləri həyata keçirməkdir.
Bu barədə AZƏRTAC-a AzTU-dan məlumat verilib. Bildirilib ki, AzTU-nun üzv seçilməsi və bununla bağlı imkanların müzakirəsi məqsədilə Alyansın region üzrə meneceri Yuri Kuprianovun iştirakı ilə universitetdə görüş keçirilib. Görüşdə AzTU-nun beynəlxalq əlaqələr üzrə prorektoru Fariz Məmmədov, universitetin İctimai şurasının sədri Osman Gündüz, İqtisadiyyat və statistika kafedrasının müdiri Arzu Süleymanov, Beynəlxalq ticarət, logistika və marketinq kafedrasının professor-müəllim heyəti iştirak edib.
Söhbət zamanı Alyansın universitetlər üçün yaratdığı imkanlar, habelə AzTU-nun professor-müəllim heyəti, tələbələr və tədqiqatçıların fevral ayından başlayaraq SAP-ın qlobal təlim sessiyalarına cəlb olunması və digər əməkdaşlıq məsələləri müzakirə edilib.

Elm və təhsil 2024-02-23 20:55:00