Bakı, 19 yanvar, AZƏRTAC

SSRİ rəhbərliyinin göstərişi ilə Bakıda və ətraf rayonlarda dinc əhalinin kütləvi şəkildə qətlə yetirildiyi yanvarın 19-dan 20-nə keçən ən qanlı gecədən 34 il ötür. Sovet qoşunlarının törətdiyi Yanvar faciəsi nəticəsində 150 dinc sakin həlak olub, daha 744 nəfər, o cümlədən qadınlar, uşaqlar və qocalar, tibb işçiləri və polislər yaralanıb. 1990-cı ilin faciəli hadisələrinin qurbanlarına “20 Yanvar şəhidi” deyilir. Ümumilikdə, Azərbaycanda 150 “20 Yanvar şəhidi” var.
AZƏRTAC xəbər verir ki, bu sözlər Türk Dövlətləri Parlament Assambleyasının (TÜRKPA) 20 Yanvar – Ümumxalq Hüzn Günü ilə bağlı bəyanatında yer alıb.
Bəyanatda deyilir: “Qardaş xalqın milli birliyinin və vətənpərvərliyinin rəmzinə çevrilən bu gündə TÜRKPA Azərbaycanın müstəqilliyi və suverenliyi uğrunda canlarından keçmiş oğul və qızlarının xatirəsini ehtiramla yad edir. Allah şəhidlərin ruhunu şad etsin!”.