Bakı, 25 noyabr, AZƏRTAC

Mingəçevir Dövlət Universitetində (MDU) Türkiyənin Ankara Hacı Bayram Veli Universitetinin Turizm fakültəsinin dəstəyi ilə ustad dərsi keçirilib.
Bu barədə AZƏRTAC-a MDU-dan bildirilib. Qeyd olunub ki, MDU-nun Magistratura və Doktorantura Təhsil Mərkəzinin təşkilatçılığı ilə hibrid formatda keçirilən ustad dərsi strateji insan resurslarının idarə edilməsi mövzusunu əhatə edib. Dərsdə universitetin bir qrup akademik heyət üzvü, biznesin idarə edilməsi, dövlət və bələdiyyə idarəetməsi ixtisasları üzrə təhsil alan magistrantlar iştirak ediblər.
İnteraktiv şəkildə təşkil olunan ustad dərsində türkiyəli professor Hakan Koç mövzu ilə bağlı təqdimatla çıxış edib və iştirakçıların suallarını cavablandırıb. Dərsdə, həmçinin fənnin sillabusunun təkmilləşdirilməsi ilə bağlı müzakirələr aparılıb.
Qeyd edək ki, cari tədris ilindən MDU-da magistratura səviyyəsində tədris olunan fənlər üzrə tərəfdaş Türkiyə universitetlərinin dəstəyi ilə ustad dərslərinə başlanılıb. Əsas məqsəd universitetdə magistratura təhsilinin məzmununun yenilənməsinə və keyfiyyətinin yüksəldilməsinə, eləcə də müvafiq ixtisaslar üzrə təhsilalanların və təhsilverənlərin bilik və bacarıqlarının artırılmasına töhfə verməkdir. Ustad dərslərlə bağlı təşkilati işlərə Qazi Universitetinin MDU-da fəaliyyət göstərən qonaq professoru Cemal Yılmaz koordinatorluq edir.