Pekin, 28 sentyabr, AZƏRTAC

Azərbaycanın rəqəmsal inkişaf və nəqliyyat naziri Rəşad Nəbiyev Çində bu ölkənin aviasiya siyasətini formalaşdıran Çin Mülki Aviasiya Administrasiyasının rəhbəri Son Ciyonla görüşüb.
AZƏRTAC xəbər verir ki, görüşdə iki ölkə arasında aviasiya sahəsində əməkdaşlığın inkişafı, o cümlədən pilotların hazırlanması, təlimlərin təşkili məsələləri müzakirə olunub.
Bundan başqa, Azərbaycan ilə Çin arasında mülki uçuşların və təyinat məntəqələrinin artırılması, Çin şirkətlərinin Azərbaycanın regional hava limanlarının operatorluğuna dair fikir mübadiləsi aparılıb.
Azərbaycan nümayəndə heyətinin səfər çərçivəsində Çinin aviasiya və logistika şirkətlərinin nümayəndələri ilə görüşləri olub, ölkəmizin müvafiq sahələr üzrə potensialı barədə təqdimatlar edilib.