Azərbaycanın startap ekosisteminin uğurları Qlobal Sahibkarlar Konqresində
Bakı, 19 sentyabr, AZƏRTAC
Avstraliyanın Melburn şəhərində Qlobal Sahibkarlıq Şəbəkəsi tərəfindən Qlobal Sahibkarlar Konqresi (“GEC2023”) keçirilir. Tədbirdə dünyanın 30 ölkəsindən dövlət rəsmiləri, iş adamları və startaplar iştirak edirlər. Konqresdə Kiçik və Orta Biznesin İnkişafı Agentliyinin (KOBİA) nümayəndələri də iştirak edirlər.
KOBİA-dan AZƏRTAC-a bildirilib ki, “GEC2023” çərçivəsində təşkil olunmuş “Startaplar üzrə nazirlər görüşü” tədbirində KOBİA-nın İdarə Heyətinin sədri Orxan Məmmədov Azərbaycanın innovasiya ekosistemi və ölkəmizdə startapların dəstəklənməsi təcrübəsi barədə məlumat verib. Qeyd edilib ki, Azərbaycanda startap ekosisteminin dəstəklənməsi və inkişafı sahəsində bir çox uğurlu islahatlar aparılır, o cümlədən qanunvericilik təkmilləşdirilir, startaplar üçün müxtəlif təşviq və güzəştlər tətbiq olunur, dövlət və özəl sektor tərəfindən dəstəklənən 10-a yaxın inkubator və akselerasiya mərkəzi fəaliyyət göstərir. Startaplara onlara vergi güzəştlərini nəzərdə tutan “Startap” şəhadətnaməsi verilir. İndiyədək KOBİA tərəfindən mikro və kiçik sahibkarlara 100-dən çox belə sənəd təqdim olunub. “Bakı KOB evi”ndə Startap İnkişafı Mərkəzi fəaliyyət göstərir, innovativ layihələrə qrant dəstəyi verilir.
Orxan Məmmədov vurğulayıb ki, Azərbaycan əraziləri 30 illik erməni işğalından azad edildikdən sonra bu ərazilərdə “ağıllı şəhər” və “ağıllı kənd” konsepsiyalarının tətbiqinə başlanılıb. Azərbaycan hökuməti tərəfindən Qarabağ bölgəsində innovativ və rəqəmsal cəmiyyətin, iqtisadiyyatın yaradılması üçün bərpa və yenidənqurma prosesində ən müasir texnologiyalar və həllərdən istifadə edilir.
Azərbaycan və Türkiyənin dövlət başçılarının Naxçıvan səfərində bir çox vacib məqamlar var - ŞƏRH
Bakıda Türk Dövlətləri Təşkilatının kənd təsərrüfatı üzrə İşçi qrupunun III iclası keçirilib
Zığ qəsəbəsinin bir hissəsinə içməli suyun verilməsində məhdudiyyətlər olacaq
İqdır-Naxçıvan qaz xətti Muxtar Respublikanı etibarlı və dayanıqlı enerji ilə təmin edəcək - ŞƏRH
Ekspert:Türkiyə Prezidentinin səfəri Zəngəzur dəhlizini bloklamağa çalışan güclərə mesajdır