Bakı, 8 sentyabr, AZƏRTAC

Gənclər və idman naziri Fərid Qayıbov sentyabrın 7-8-də Beynəlxalq Etnosport Festivalında iştirak etmək üçün Özbəkistanın Xivə şəhərinə səfər edib.
Nazirliyin mətbuat xidmətindən AZƏRTAC-a verilən məlumata görə, nazir festivalın açılışında, eləcə də Beynəlxalq Etnosport Forumunda iştirak edib, mas-reslinq yarışlarında Azərbaycan idmançılarının çıxışlarını izləyib.
Fərid Qayıbov, eyni zamanda, festival çərçivəsində bir neçə ikitərəfli görüşlər keçirib. Beynəlxalq Etnosport Konfederasiyasının prezidenti Nəcməddin Bilal Ərdoğanla görüşdə Azərbaycanda etnoidman növlərinin inkişafı, ölkəmizdə bu növlərdə təşkil olunan tədbirlər barədə müzakirələr aparıb. Nazir, həmçinin özbəkistanlı və rusiyalı həmkarları ilə ikitərəfli görüşlər keçirib.