Bakı, 16 avqust, AZƏRTAC

Avqustun 16-da “Batareyaları təhvil ver, təbiəti qoru” layihəsi çərçivəsində 67 kiloqram işlənmiş batareya toplanılaraq "Təhlükəli Tullantılar" MMC-yə təhvil verilib.
AZƏRTAC xəbər verir ki, hazırda müxtəlif dövlət qurumlarında, şirkətlərdə, marketlər şəbəkələrində, ali və orta ixtisas təhsil müəssisələrində, banklarda və otellərdə təhvil qutuları yerləşdirilərək layihəyə dəstək verilir. Cari il ərzində indiyədək 472 kiloqram batareya toplanılıb.
Ekologiya və Təbii Sərvətlər Nazirliyi bu prosesə töhfə verən bütün tərəfdaşlara, vətəndaşlara təşəkkür edir, hər kəsi təhlükəli və istifadəyə yararsız olan batareyaların məişət tullantılarına qarışdırılmasına yol verməməyə, batareyalar üçün ayrılan xüsusi qutulardan istifadə etməyə çağırır.
Qeyd edək ki, “Batareyaları təhvil ver, təbiəti qoru” layihəsinə 2022-ci il mayın 1-də Ekologiya və Təbii Sərvətlər Nazirliyi və “Qırmızı Ürəklər” Fondu tərəfindən başlanılıb.