Bakı, 26 iyul, AZƏRTAC

İyulun 26-sı Beynəlxalq Manqrov Ekosisteminin Mühafizəsi Günüdür. AZƏRTAC xəbər verir ki, UNESCO-nun Baş direktoru Odri Azulay bu münasibətlə dünya ictimaiyyətinə müraciət edib.
Müraciətdə qeyd edilir: “Manqrovlar təhlükə altındadır: təxmin edilir ki, hazırda dünyada manqrovların dörddə üçündən çoxu və onlardan asılı olan bütün su və quru orqanizmləri təhlükə altındadır. Bu səbəbdən, UNESCO digər qiymətli mavi karbon ekosistemləri ilə, onun geoloji parkları, Dünya İrs şəbəkəsi və biosfer ehtiyatları vasitəsilə onları qorumaq üçün hərəkətə keçməyə qərar verib”.
Manqrovlar quru və dəniz arasındakı sərhəddə nadir, möhtəşəm və məhsuldar ekosistemlərdir. Bu qeyri-adi ekosistemlər bütün dünyada sahil icmalarının rifahına, ərzaq təhlükəsizliyinə və qorunmasına töhfə verir. Onlar zəngin biomüxtəlifliyi dəstəkləyir, həmçinin balıq və xərçəngkimilər üçün əlverişli yaşayış mühiti təmin edir. Manqrovlar, həmçinin fırtına dalğalarına, sunamilərə, dəniz səviyyəsinin qalxmasına və eroziyaya qarşı təbii sahil müdafiəsi funksiyasını yerinə yetirir. Onların əhatə etdikləri torpaqlar böyük miqdarda karbonu özündə saxlayan yüksək təsirli karbon qazı yuvalarıdır. Bununla belə, ciddi ekoloji və sosial-iqtisadi təsirlərə məruz qalan manqrovlar ümumi qlobal meşə itkisindən üç-beş dəfə tez yox olur. Cari hesablamalar göstərir ki, son 40 ildə manqrov örtüyü ikiyə bölünüb.
Manqrov ağacları Cənub-Şərqi Asiya, Afrika, Avstraliya, Asiya, Şimali və Cənubi Amerikanın tropik və subtropik sahillərində yerləşir. Birləşmiş Ştatlarda isə onlar Florida ştatında olan su sahillərini əhatə edir.