Bakı, 9 iyun, AZƏRTAC
Niderland Ali Məhkəməsi Krım muzeylərinin kassasiya şikayətini rədd edərək qərara gəlib ki, skif qızılı Ukraynaya verilməlidir.
AZƏRTAC xəbər verir ki, Amsterdamın Apellyasiya Məhkəməsi 2021-ci ildə kolleksiyanın Ukrayna dövlətinə verilməsi barədə qərar qəbul etmişdi. Beləliklə Ali Məhkəmə həmin qərarı qüvvədə saxlayıb və bu məsələ ilə bağlı məhkəmə çəkişməsi başa çatıb.
Krım muzeylərinin kassasiya şikayətində Apellyasiya Məhkəməsinin qərarının insan hüquqları üzrə Avropa Konvensiyasının birinci protokolunu pozduğu iddia olunurdu. Niderlandın Baş prokuroru Pol Flas isə skif qızılının Ukraynaya verilməli olduğunu və Apellyasiya Məhkəməsinin müvafiq qərarının qüvvədə olan milli qanunlar məcəlləsinə əsaslandığını, qanuni ictimai maraqlara cavab verdiyini bildirmişdi.