Bakı, 3 iyun, AZƏRTAC

Bakıda keçirilən taekvondo üzrə dünya çempionatında daha iki çəki dərəcəsi üzrə mükafatçılar müəyyənləşib.
AZƏRTAC əbər verir ki, yarışın beşinci günündə qadınlar arasında 46 kq-da qızıl medal Lena Stoykoviçə (Xorvatiya) qismət olub. O, finalda Siken Kamonçanoku (Tayland) məğlub edib.
Üçüncü yeri Ruka Okamoto (Yaponiya) və Vanq Xiaolu (Çin) tutub.
Kişilər arasında 54 kq çəkidə dünya çempionu titulunu Tay-Jun Park (Cənubi Koreya) qazanıb.
Gümüş medala Hüqo Arilyo Vaskes (İspaniya) layiq görülüb. “Üçlüy”ü Omonjon Otajonov (Özbəkistan) və Görkem Polat (Türkiyə) tamamlayıblar.
Bu çəkidə Azərbaycan millisinin idmançılarından Minayə Əkbərova (46 kq) 1/16 finalda Ruka Okamotoya (Yaponiya), eyni mərhələdə Səyyad Dadaşov (54 kq) isə Omonjon Otajonova (Özbəkistan) məğlub olub.
Qeyd edək ki, mundiala iyunun 4-də yekun vurulacaq.