Lerikdə əkin sahələrinə Mərakeş çəyirtkələri yayılıb VİDEO
Lerik, 1 iyun, AZƏRTAC
Lerikin dağlıq kəndlərində Mərakeş çəyirtkələri əkin sahələrinə yayılıb. Ziyanvericilərə qarşı mübarizə tədbirlərinə başlanılıb.
AZƏRTAC-ın bölgə müxbiri xəbər verir ki, əkinlərə ciddi zərər vuran Mərakeş çəyirtkələri Lerikin Blaband kənd ərazi dairəsindəki yaşayış məntəqələrinin örüş sahələrində yayılıb. Ərazidə heyvan otaran çobanlar yerli icra strukturlarını bu barədə məlumatlandırıblar. Sakinlər deyirlər ki, indiyədək belə halla qarşılaşmayıblar.
Qonşu kəndlərin sakinləri də təşviş içərisindədirlər. Onlar böyük zəhmət hesabına əkib-becərdikləri taxıl zəmilərini çəyirtkələrin məhv edəcəyindən narahatdırlar.
Çəyirtkələrin əkin sahələrinə yayılmasının qarşısını almaq üçün Lerik Bitki Mühafizə Mərkəzi tərəfindən mübarizə tədbirlərinə başlanılıb. Mübarizə tədbirləri ultra kiçikhəcmli müasir və yüksək manevr qabiliyyətinə malik çiləyici aqreqatlar və yerüstü çiləyicilər vasitəsi ilə həyata keçirilir.
Çəyirtkələrin yayılma ərazisi geniş olduğuna görə Leriklə yanaşı, Masallı və Lənkəran Bitki Mühafizə mərkəzlərindən də texnikalar cəlb edilib. Əvvəlki illərin müşahidəsinə görə, Lerik ərazilərində çəyirtkənin bu cür miqrasiyası qeydə alınmayıb.
Mərakeş çəyirtkələri 250 kilometr məsafəni uça bilirlər ki, bu da təsərrüfatlar üçün nə qədər təhlükəli olmalarından xəbər verir. Zərərvericilər əkin sahələrinə kütləvi şəkildə miqrasiya edərək, bir neçə saat ərzində sahəni yararsız hala salır.
Ağstafada Aqrar İnnovasiya Festivalı çərçivəsində toxum sərgi-satış yarmarkası təşkil olunub
Bu il Oğuzun taxıl sahələrində orta məhsuldarlıq 30,9 sentner olub
Balakənli fermerlər 7819 hektar sahədə dən üçün qarğıdalı yetişdiriblər
Bu il Beyləqanda 23 min tondan çox pambıq istehsalı gözlənilir
Qəhvəyi mərmər bağacığını aşkar etmək məqsədilə Şəkinin kəndlərində 100 feromon tələ asılıb