Quba, 30 may, Elxan Yusifli, AZƏRTAC

Quba-Xaçmaz Regional Təhsil İdarəsinin tabeliyində fəaliyyət göstərən seçilmiş 17 məktəbdə mayın 26-dan TIMSS (Trends in International Mathematics and Science Study) və ICILS (International Computer and Information Literacy Study) beynəlxalq qiymətləndirmə imtahanları keçirilir.
AZƏRTAC-ın bölgə müxbiri xəbər verir ki, riyaziyyat və təbiət elmləri üzrə beynəlxalq qiymətləndirmə imtahanlarına IV və VIII sinif şagirdləri cəlb olunur. İmtahan prosesi iyunun 10-dək davam edəcək.
TIMSS beynəlxalq qiymətləndirmə tədqiqatı 4 ildən bir IV və VIII sinif şagirdləri arasında, ICILS beynəlxalq qiymətləndirmə tədqiqatı isə 5 ildən bir yalnız VIII sinif şagirdləri arasında keçirilir.
Tədqiqatların əsas məqsədi şagirdlərin nəticələri əsasında təlim və tədrisin təkmilləşdirilməsi üçün məlumat toplamaq, eləcə də beynəlxalq müqayisələr aparmaqdır.