Bakı, 30 may, AZƏRTAC

Dövlət sosial xidmətləri sahəsində e-texnologiyaların tətbiqi aparılan sosial islahatların əsas istiqamətlərindən biridir. 2018-2023-cü illərdə Əmək və Əhalinin Sosial Müdafiəsi Nazirliyinin fəaliyyət sahələri üzrə geniş rəqəmsallaşdırma proqramı icra olunub və hazırda nazirlik üzrə 153 xidmətdən 143-ü e-qaydada təqdim edilir.
Həmin dövrdə nazirliyin e-sistemlərinə edilmiş e-sorğu və müraciət sayı 568 milyon, e-xidmətlərinə müraciət sayı 63,4 milyon olub. 2019-cu ilin əvvəlindən 51 proaktiv xidmət yaradılaraq 720 min təyinat proaktiv qaydada həyata keçirilib. 31 e-arayış xidməti üzərindən 3,3 milyon e-arayış verilib, elektron qaydada 691 min fərdi hesab açılıb.
Əmək və Əhalinin Sosial Müdafiəsi Nazirliyinin İctimaiyyətlə əlaqələr şöbəsindən AZƏRTAC-a verilən məlumata görə, 2019-cu ildən istifadəyə verilən e-sosial.az portal ölkənin sosial reyestri olmaqla, vətəndaşlara onlar barədə toplanılmış bütün sosial məlumatlara çıxış və yaranan sosial-əmək hüquqlarının təminatına nəzarət imkanı yaradır. Ötən dövrdə həmin portaldan 68,7 milyon dəfə istifadə olunub.
2022-ci ilin may ayında istifadəyə verilən “Əmək və Məşğulluq” altsistemi (ƏMAS) isə vahid əmək münasibətləri platformasıdır. Həmin altsistem vasitəsilə əmək münasibətləri zamanı kağız üzərində aparılan bütün əməliyyatların elektron müstəviyə keçidi, həmçinin əmək müqavilələrinin kağız üzərində deyil, e-qaydada bağlanması, rəqəmsal kadr uçotuna keçilməsi təmin olunur.
E-sosial.az və ƏMAS Beynəlxalq Telekommunikasiya İttifaqının Ümumdünya Sammiti – 2023 tədbiri çərçivəsində keçirilən, müxtəlif ölkələrdən 18 kateqoriya üzrə 900 layihənin iştirak etdiyi müsabiqədə “Çempion layihə” mükafatları ilə təltif edilib. Habelə ƏMAS 2022-ci ildə “IDDA Awards” müsabiqəsində “İlin Rəqəmsal Layihəsi” elan edilib. Nazirliyin tabeliyindəki Dövlət Məşğulluq Agentliyinin rəsmi veb-saytı (www.dma.gov.az) “Qlobal Hökumət Mükəmməlliyi” mükafatı üzrə “İlin veb-saytı” nominasiyasının qalibi olub.